Barita Malas ni Uhur hun Tano Niha… (Pesta Olob-olob Jubileum 108 Tahun Ambilan Na Madear i Simalungun GKPS Resort Sibolga)

Ibagas na tolu ari, mamungkah ari Sabtu 10 September 2011 das bani ari Senin, 12 September 2011 domma saud mardalan rangkaian Pesta Olob-olob Jubileum 108 Tahun Ambilan Na Madear i Simalungun GKPS Resort Sibolga, na marianan i GKPS Gunung Sitoli Nias. Tarimakasih pakon puji-pujian ma sombahkononta hubani Tuhan halani holong pakon pasu-pasuNi tumang do boi mardalan ibagas na torsa haganupan ranggini horja on.

Rangkaian Pesta olob-olob on ipungkah marhiteihon acara ramah tamah pakon sharing antara Kuria GKPS sa resort Sibolga pakon Pimpinan Pusat GKPS (na bani panorang ai iwakili Pdt. R.J. Saragih pakon Preases GKPS Distrik I, Pdt. Abdi Jekri Damanik). Mardalan do acara ai ibagas suasana na serius tapi santai, anjaha buei do usulan-usulan sonai age curahan hati pasal parkuriaon humbani pagori ni kuria sa resort on domu hubani hinajengesni horja itongah-tongahni kuria ni Tuhan hulobeianni ari. Andohar ma marhiteihonni ramah-tamah pakon sharing on, lambin roh jengesni ma hasadaon ronsi pangidangion bani tiap-tiap kuria. Paima acara on, ibahen Panitia pakon Kuria GKPS Gunung Sitoli do jamuan mangan malam ala Nias, aima marhiteihon na mangondoskon simbi hubani Pimpinan Pusat GKPS na mewakili haganup kuria sa resort Sibolga.

Bani ari Minggu, 11 september 2011, ipungkah pukul 10.00 ipamasa ma Ibadah Perayaan Pesta olob-olob GKPS Resort Sibolga na ibobahon Pdt. Abdi Jekri Damanik (Paragenda), Pdt. R.J Saragih (Parambilan), Pdt. Julinda Sipayung (Tonggo syafaat) pakon St. M. Harefa (siboban doding). Bani Ambilanni (Jesaya 29:17-24), Pdt. R.J. Saragih padaskon bahasa goluh ni halak na dob manjalo Ambilan Na Madear aima goluh na totap mar-restorasi (memperbaharui), totap manggoluh ibagas relasi vertical & horizontal, janah goluhni totap gabe revelation (penyataan) holong ni Tuhan. Halani ai,  onjolanni goluhni maningon Hata ni Naibata sedo power, provit pakon Pride. Halani ai halak na marolob-olob taridah bani goluhni na totap maronjolan bani gogohni Naibata anjaha marprinsip H2O (Hidup Harus Optimis). Domu hujai, momentum perayaan pesta olob-olob GKPS Resort Sibolga i Gunung Sitoli on iarapkon do gabe titik berangkat bani ganup pagori laho totap memperbaharui goluh, totap ibagas relasi na harmonis janah mambahen goluhni gabe hitei hatatalarni holongni Naibata. Bani ibadah on, dihut do ambil bagian haganup seksi sonai homa undangan (Mahasiswa STT Sunderman Gunung sitoli) marhiteihon galangan pujian pakon koor. Janah roh do homa bani panorang ai undangan aima humbani Pemerintah Kota Gunung Sitoli (iwakili Bapak Drs. A. Zendrato), warga Simalungun Gunung sitoli & sekitarni, sonai homa simpatisan Simalungun. Dear do mardalan ibadah on. Dob honsi ibadah, acara ilanjutkon marhiteihonni ucapan selamat pakon acara rup mangan iselingi hiburan.

Bani acara pesta olob-olob on, ibahen do tortor humbani tiap-tiap kuria, fulltimer GKPS  sonai homa age undangan. Marhiteihonni tortor on ma ganup kuria ronsi undangan na hadir padaskon siluah olob-olobni janah rup manghamalaskon pesta iman olob-olob GKPS Resort Sibolga on. Rup manortor do haganupan ibagas malas ni uhur. Hansi pe cuaca bani panorang ai hurang mendukung halani roh udan, tapi malas do uhur, lang lanjar surut semangatni na hadir bani acara ai laho manortor mangolobkon pesta on. Suasana malas ni uhur bani panorang ai itoruskon marhiteihon acara ramah tamah (marsombuh sihol) warga Simalungun se Gunung Sitoli dan sekitarni. Iarapkon marhitei acara ai, warga Simalungun na mardomisili i Gunung Sitoli dan sekitarni boi mangahapkon kehadiran Simalungun i Gunung Sitoli janah lambin jenges hasadaon warga Simalungun i wilayah Gunung Sitoli.

Patarni, Senin, 12 September 2011, ibahen do homa acara darmawisata laho menikmati hinajengesni panorama alam pakon keunikan budaya Nias. Pardalanan on ipungkah marhiteihon na menikmati keunikan tradisi ombo batu i desa adat Bawomataluo Nias Selatan. Lambin tambah ma malas ni uhurni hagaunupan peserta menikmati keunikan budaya ai. Dobhonsi ai, rombongan berangkat menuju pantai Sorake laho menikmati suasana indah pantai dengan deburan ombak na jenges.

Puas menikmati keunikan budaya pakon keindahan panorama pantai Sorake, mulak ma use rombongan hu Gunung Sitoli anjaha bersiap-siap mulak hu Sibolga. Pukul 19.00 WIB berangkat ma haganup rombongan mulak hu Sibolga melalui Pelabuhan Gunung Sitoli. Rombongan iberangkathon majelis jemaat pakon kuria GKPS Gunung Sitoli.

Marhitei Barita on, ipadas panitia do hata tarimakasih hubani haganup pihak na dob mamberehon dukungan moril pakon materil bahen hatatorsani pesta olob-olob GKPS resort Sibolga on.