Ambilan Minggu Advent I, 2 Desember 2012

Ambilan Minggu Advent I, 2 Desember 2012 
Jeremia 33:14-16 

Hatorangan 

Jeremia aima niombahni Abyatar sahalak malim kopala hun suku Lepi bani panorang Raja Daud (1 Sam. 22:20; 2 Sam. 20:25). Horja hanabionni ipungkah bani panorang haposoon (+ 20 tahun) kira-kira tahun 627 SM i Juda, das hubani na tarbuang bangsa Juda hu Babel bani tahun 587 SM. Bani masa 40 tahun pangidangionni nabi Jeremia, bangsa Juda mengalami pergolakan na hebat. Kerajaan Juda terjebak itongah-tongahni persaingan politik kerajaan Asyur, Masir pakon Babel na sihol manrajai Timur Tengah, termasuk Juda. Pasca pemerintahan raja Josia (na tarbunuh i Megido), Juda membangun persekongkolan politik pakon Masir & Asyur laho menghindari invasi Babel. Persekongkolan on lang pitah mempengaruhi kehidupan politik bangsa Juda, tapi dihut do merambah das hubani goluh parugamaon. Peribadatan hubani dewa-dewa asing (na sebelumni ihancurhon Josia) mulai marak, anjaha panumbahan hubani Naibata gabe itundalhon. 

Bani kondisi on, ipadas Jeremia do uhumni Naibata bani Juda (Raja Zedekia) bahasa ondoskononni Naibata do bangsa ai hubani Babel (Jer. 32:2-3). Gabe manringis ma Raja Zedekia hubani Jeremia anjaha ipamasuk ma ia hubagas tutupan. Bani panorang ambilan on sanggah tartutup do si Jeremia bani ianan ni si parjaga, na ibagas istanani raja ni Juda, ipatutupkon si Zedekia. Tongon, bani tahun 586 SM Nebukadnezar menyerang Juda anjaha mengangkut bangsa ai hu habuangan Babel. Habuangan Babel aima hatatalarni uhumni Naibata bani bangsa na manundalhonSi. Bani bangsa Israel, habuangan usih songaon hamateian, akhir dari segalanya! Tapi lang anggo bani Nabi Jeremia, habuangan sedo ujungni pargoluhan. Itongah-tongahni hagolapan ai, pasti adong titik cahaya. Ai do ase, bani situasi habuangan ai, totap do ipatugah Jeremia padanni Naibata na sihol paluahkon sidea. Jaloonni sidea do haluahon humbani Naibata bani habungan ai. Domu hujai, ipadas Jeremia do bagah-bagah haluahon domu hubani padanni Naibata hubani ompungni sidea (2 Sam. 7:12-16). Ase, marhiteihon pardasni bagah-bagah ai gabe tubuh ma pangarapan bani bangsa ai itongah-tongah situasi pargoluhan na manaron i habuangan. 

Bani ayat 14 isobut do: “Tonggor ma, na roh ma panorangni, pasaudonKu ma ijai bagah-bagah na dob hubahen bani ginompar ni Israel ampa bani ginomparni Juda”. Hunjon boi idahonta bahasa na setia do Naibata bani padanNi. Aha na dob binagahkonni Naibata maningon patalaronNi do bani panorangni. Lang piga dokah nari talar ma haluahon hubani Juda. Hatatalarni haluahon ai ipataridahkon marhiteihonni harohanni sada tumbor na pintor bani si Daud (Ay. 15). Istilah tumbor na pintor martudu-tudu hubani sahalak Mesias (Juru Selamat) humbani ginomparni Daud, na manggomgomi Israel ibagas hasintongan ampa hapintoron (Bdk. Jes. 11:1; Jer. 23:5-6). Anjaha martudu-tudu hubani Kristus sipaluah. Harorohanni Mesias na manggomgomi ibagas hasintongan pakon hapintoron ai mangkorhon konsekwensi positif bani pargoluhanni bangsaNi. Ihatahon bani ayat 16, marhitei panggomgomionNi ai gabe maluah ma Juda anjaha gok hasonangan ma Jerusalem anjaha marmulia ma bangsa na ibagas gomgomanNi. Situasi on ma na sinobut realitas syalom, aima realitas na tubuh hinorhonni kehadiran Mesias.  

Point-Point Aplikasi 

1. Hal na unik bani pengalaman Jeremia aima hasirsironni manaron halani laho pajongjongkon hasintongan. Keluar dari “zona aman” laho manghopkop hasintongan. Kontras pakon na masa nuan on. Buei do jolma na memilih “zona aman” hansi pe lang be mardalan be ia bani hasintongan (bdk. Flp. 1:21). 
2. Gati do sitaronon manutup matani paruhuranta laho manatap kesetiaan, keadilan pakon hasintonganni Naibata. Ambilan on pasingatkon hita bahasa seng anjai iporsou Naibata padanNi. Lang ongga lupa Ia hubani bagah-bagahNi. Na roh do holi panorangni banta laho manjalo hagogok ni bagah-bagah-Ni ai, anggo totap hita mambuka matani paruhuranta laho manatap ai. 
3. Anggo itulimati hita fenomena na terjadi i lingkunganta, hasintongan ampa hapintoron mulai ma gabe barang langka. Tontu, lang be panorangni banta laho marhutuk pasal ai. Domma roh banta Jesus Kristus mamboan banta hasintongan ampa hapintoran in, ase boi hita manggoluh ibagas hasintongan ampa hapintoran. Artini, panjaloanta bani Kristus, ai do na patalubkon hita manghajongjongkon hasintongan pakon hapintoron bani pargoluhan on. In do homa na memampuhon hita gabe agen-agen hasintongan pakon hapintoron i lingkunganta bei. 
4. Domma roh Tuhanta in janah sihol roh do Ia use bani parroh-Ni na paduahalihon. Halani ai alo-alo hita ma parroh-Ni in ibagas malas ni uhur, marhitei malas ni uhur na gok. Ai na roh do Ia mamboban haluahonta ampa damei banta. Domma roh pardameianta, panorangni ma banta manghagoluhkon anjaha “padalitkon” ai hubani hasoman! Tambahi hita!